फुले जणु अद्वैताचे फूल

भगवान श्रीरामकृष्ण

फुले जणु अद्वैताचे फूल || धृ ||

कोमल तनु ही तपे वाळली

अविचल भावे शान्त बैसली

भावावेगे कधी डोलली

कधी न देखाव्याची झूल || १ ||

नयनांमाजी अखंड करुणा

एके भावी असे धारणा

कधी वृत्ति न उठे दारुणा

असे मनि समरसतेचा डोल || २ ||

दया दाटली अंत: करणी

वेदांताची नसे दाटणी

मंजुळ शब्दें नटली वाणी

मनामधि श्रवणें रुतती बोल || ३ ||

संगे माता असे सारदा

तीहि फुलाच्या घेई छंदा

ऐक्य पावली ती सुखकंदा

तयां ना तनुभोगाची भूल || ४ ||

विवेक संगे जो आनंद

तया संगती जमले वृन्द

ज्ञानें प्रेमें झाले धुंद

पश्चिम प्राची झाले पूल || ५ ||